Club Poetico

'A casa senza mamma è nu camino senza fuoco,
na funtana secca, na pazziella senza juoco.
Na connola senza ninno, nu cielo senza sole,
na mammella senza latte, nu pietto senz'ô core.

'A mamma p'ogni ffiglio tene na bbona parola:
pure si nun ha studiato 'o fa na bbella scola.
Nun è mmiedeco, nfermera...ma te sape curà.
Nun ha aggirato 'o munno...ma te sape guidà.

Nun è na cunferenziera...ma te sape parlà.
Nun è nu cardellino, però sape cinguettà.
Nun è ffata, né mmaga, ma te sape ammalià.
Nun è nu faro, ma 'e notte te sape illumminà.

Tutto chello ca tene...si po'...essa t' 'o ddà,
...si pure tene poco, a tte ne dà 'a mmità.
Pure si 'e tanta cose nun tene cunuscenza,
p' 'o figlio sujo addeventa ll'arca 'e scienza.

Sta vicino a tte...e si pure staje luntano,
sempe te prutegge e tte tene p' 'e mmane.
Pure si 'o ffiglio sujo è nu granne scellerato,
essa 'o perdona sempe 'stu figlio disgraziato.

Te sta sempe accanto, sta llà vicino a tte,
te sape sta' appriesso senza darlo a vvedé.
P' 'o figlio sujo se jetasse dint'ê ffiamme.
Che granne tesoro è 'o bbene 'e na mamma.

Mme sento na tristezza nfunno ô core,
ca mme ncuieta e mme porta pucundria.
Nun saccio che d'è chesta amarezza,

chest'afflizione, chesta malincunia.
Sarrà ca penzo ô cielo quann'è ggrigio
e rregne 'e nuvole scure ll'orizzonte.

Saranno ll'anne mieje ca vanno fujenno
e i' 'e nvecchià...nun me sento pronta.
Sarrà 'stu forte addore 'e primmavera

che a ll'intrasatto accumpare preputente.
Sarrà c'ogni ccosa cresce, pasce, more;
ma accussì hadda jì e nun se po' ffa' niente.

Sarrà 'a paura 'e chello ca vene dimane
e io nun saccio pe qquantu tiempo ancora,
pozzo vedé 'o mare, 'o cielo, 'e stelle, 'a luna,

'o sole ca tramonta, 'a nascita 'e ll'aurora.
Accussì mme succede ca senza vulé,
mme piglia 'a malincunia e nun saccio pecché.

M'abbastasse ca senza dicere tanta parole,
quaccheduno mme parlasse core a ccore.
Appujann'a mana nfaccia cacciasse 'a tristezza
e i' stesse meglio: ê vvote abbasta na carezza.

'O pueta è nu sognatore visionario,
sta sempe cu 'o naso a gguardà ll'aria.
Mmiez'ê nnuvole tene nu castello,
pe suffitto nu cielo chino 'e stelle.

Pe ffeneste tene curnice chine 'e viole,
'a do' traseno e jesceno 'e pparole.
Pe pparete tene cristalle sfaccettate,
che rifletteno 'e culure 'e ll'estate.

Ncopp'ô tavolo tene calice argiento,
'a do' surzea ammore e ssentimento.
'O pueta è nu mago prestigiatore...
tanta cose piglia 'a 'int'ô cappiello:

nu raggio 'e sole, 'a luna rossa, na stella...
nu cardillo, nu cuniglio c' 'o mbrello.
Int'â ll'anema tene nu furziere,
addó tene astipate mille penziere.

Tene 'a casa chiena 'e strumiente,
ca sona a ssiconda d' 'o mumento.
Quann'è triste sona na chitarra stunata,
ma quanno sona cu nu pianino ntunato...

'e llettere volano ncielo, po' bbello e bbuono
se metteno nzieme e mmentano na canzona.
Tene tante armadie cu gruosse terature
chine 'e parole...e ccore russe nfacc'ê mure.

'Int'ê scanzie tene pennielle e mmatite:
lle serveno pe culurà 'e fatte d' 'a vita.
Quann'e notte 'o scuro fa accappunà 'a pelle
isso nce mette 'a luna e mille llucelle.

Quanno 'e nnuvole minacciano n'acquazzone
isso cu pastello giallo disegna 'o sole lione.
Che fa 'o pueta quanno lle vene 'a pucundria?
Aiutandosi cu ll'ammore e 'a fantasia...

piglia pe mmano 'a tristezza e ll'amarezza
cerca 'e trasfurmà chella ca vede nbellezza.
Che ppo' ffa' nu pueta, ma c'ha dda fa':
cerca 'e culurà 'e rosa 'o ggrigio ca ce sta.

Piglia tutte 'e llacreme appassiunate...
'e ccoglie...e 'e ffa addeventà rugiada.
Quanno 'a vita 'o culpisce c' 'a mana smerza,
pe s'accujetà se scrive quacche verzo.
"

Scenne lenta lenta, chianu chiano:
nu' lle piace pe nniente e fa rummore.
Ncopp'a ogni ccosa mette 'e mmane
e vva pittanno 'e janco chello ca trova.

Lle piace e cummiglià cu na carezza,
'e ccase, 'e scianche d' 'e mmuntagne.
Mentre nisciuno sente essa scennenno,
va culuranno arbere e ffoglie sulagne.

'E rrenne e ttante animale dint'ê bosche,
passanno lassano orme ncopp'ê mante:
pareno fine merlette d' 'e ffate arricamate,
cu ffelille 'e zucchero doce e abbagliante.

Vugliosa e fremmenno assaporo 'a neve,
nu tremmulio mme trase dinto cucente.
Nu ciuocco mme vasa a faccia lieve lieve,
sento nu brivido: ma 'e ppassione, nun è freve.

'O core è nu carillon russo ntarsiato d'oro:
chino chino 'e tesore 'e granne valore.
È nu maestro d'orchestra cu 'e musicante,
ca sonano sinfonie quanno 'o core canta.
È nu scrigno addó aneme bbelle, cherubine,
pizzicanno 'e ccorde e viole e vviuline...
portano ncielo mille note appassiunate,
pe sunà mparaviso cante p' 'e nnammurate.
'A frennesia, 'a passione e ll'ammore,

so' tutte 'e strumiente c'adopera 'o core,
pe te fa parlà cu 'o bbrillio 'int'a ll'uocchie,
quanno pe ll'emozione t'ammancà 'a voce...
pe te fa dicere chello ca nun saje dicere,
quanno triemme d'ammore e 'o cuorpo coce.
Che ffa 'o core quanno s'appassiona?
Te sbatte mpietto e addeventa canzone.
Che ffa 'o core quanno sta nfantasia?
Te fa scrivere vierze e addeventa poesia.

Cagna tutte 'e juorne 'o sciardino d' 'a vita:
schioppa na rosa, se sfronna na margherita.
Nce sta frutta acevera, bucciuole spucchiose
e ttanta frutta ammatura, bbona e zzucosa.

Pe ttramento ca nu germoglio 'e rosa nasce,
na foglia ngialluta e stanca 'o ramo lassa.
Ogni gghiuorno 'stu sciardino cagn'aspetto:
se spoglia, po' 'e sciure nuove se mbelletta.

Quacche ffoglia ncopp'ô ramo rummane,
quacch'ata cade nterra senz'aspettà dimane.
Quanno 'o sole splenne 'int'a 'stu sciardino, sonano 'e ccampanelle, cantano 'e cardelline.

Quanno mmece chiove 'o scenario cagna:
se seccano 'e rame, 'o crisantemo chiagne.
Ntanto ca se nasce, se campa e sse more,
appassisce na foglia, nasce nu nuovo sciore.

È nu paraviso nterra esposto ô calore, ô ggelo,
cu arbere prufummate c'accarezzano 'o cielo.
Quanno po' quacche pianta se fa vecchiarella,
lassa 'stu sciardino e vva ncielo a ffa' 'a stella.

'A vita è na cannela, se cunsumma manu mano:
'o muoccolo se stuta 'int'ê mmane chianu chiano.
Ô pprincipio 'a sciamma è nu bellu fuoco ardente,
te cuoce quann'a tuocche: è fforte, preputente.

Corre e ffuje 'o tiempo, 'a miccia se cunzumma
e llassa 'int'a ll'aria ll'addore agre d' 'o fummo.
Ntanto ca pienze ô passato, a cchello ch'era...
'e nnotte, 'e juorne passano...e llenta cola 'a cera.

Comm'a 'e spiecche songhe ll'uocchie,
quanno te guardano nsistentemente:
te traseno nfino a ddint'a ll'anema,
fotografano chello ca tiene 'int'a mente.

Uocchie verde, celeste, chiare, scure:
triste, allere...uocchie 'e tanta culure!
Uocchie malinconiche cu 'e cciglie nfose,
meste e ttriste comm'a nnuvole picciose.

Uocchie adulatore, uocchie ruffiane,
uocchie sfacciate, uocchie puritane.
Uocchie busciarde, uocchie d'attore:
ca lusingano, ma nun provano ammore.

Uocchie addiruse, uocchie paunazze:
uocchie ncazzate...uocchie 'e pazze.
Uocchie scurnuse ca diceno bbelle parole
e acalano 'o sguardo pe scuorno o pudore.

Uocchie cuntente, ca rideno allere,
uocchie busciarde, uocchie sincere.
Uocchie nire comm'ô ccarbone cucente,
ca s'appicciano comm'ê tizzune ardente.

Uocchie 'e mamma addó se vede 'o core...
ca quann'addentano fridde e ssenza calore,
s'alluntanano dicenno: "vaco s'è ffatto tarde..."
primma e se nzerrà te lassano ll'urdemo sguardo.
Giovanna Balsamo

Ogn'anno venco d' 'a Lapponia a vve truvà:
so' Bbabbo Natale, chesto mme piace 'e fa'.
Sotto Natale mme piazzo ncopp'ô slittino
e pporto tanti regale a grande e piccoline.
Ncuollo tenco nu vestito nu poco scagnato:

mme va astritto pecché mme so' ngrassato.
Ogni anno m'arrivano migliaia 'e cartuline:
'a tutt'o munno me scriveno tanta letterine.
M'aggio mparato 'a calligrafia 'e uno, 'e n'ato:
'a vista nun tanto m'aiuta...pe ll'età avanzata.

Però aggio ricunusciut'a scrittura d'Annarella:
nun vo' cchiù 'a pupata...mo vo' na nennella.
Chesta c'addora 'e rose è 'a lettera 'e Cuncetta;
forze me scrive pe mme cercà n'ata vurzetta:
"Babbo Natale nun me purtà 'a stessa cosa...

chist'anno si può, vulesse nu bbellu sposo."
Chi mme cerca pazielle, chi vo' nu diamante,
chi vo' na connola, chi nu marito, chi ll'amante.
Mmiez'a tante ce sta na lettera accartucciata:
p' 'e ttroppe llacreme è nfosa e mmaldrattata.

Ll'ha scritta 'a povera Teresenella; è disperata:
pe Natale vulesse ancora 'a mamma e 'o pate.
Chi vo' na vita bbella e ssenza patimente,
chi vo' 'o ppane, chi mme cerca 'e diente!
Chi ha perzo 'a fatica e nun 'a riesce a ttruvà,

chi vo' assaje denare pe ffa 'a vita d' 'o pascià.
Ma i' che pozzo fa', vengo na vota a ll'anno,
si 'o pputesse fa', jesse sempe vulanno,
p'aiutà 'a ggenta povera e cchiù bbisognosa:
a cchi n'ave bbisogno 'o desse ogni ccosa.

Pe na vota voglio cercà i' a vvuje nu piacere:
v'aggio lassato na lettera llà, sott'ô bbicchiere.
So' pparole senza gnostro, frutto d' 'a fantasia:
so' pparole ca portano nu pucurillo d'alleria.
'E ssape leggere sulo chi tene generosità

e riesce a ttruvà 'o modo justo pe ccunfurtà.
Rialàte ammore, nisciuno s'avess' 'a ntristì:
criature e anziane nun avessan' 'a maje suffrì!
Purtate pace e ggioia p' 'e ccase, p' 'e spitale,
Donate tranquillità e sserenità, comme rialo.

Si po' vulite c' 'a surpresa è cchiù speciale,
dicite ca v'aggio mannato i'...Papà Natale.

È na parola ca te mpare a ddicere
doppo pochi mise ca si' nnato.
Nun te ll'hê mparà a scrivere,
né a leggere: nasce ggià mparato.

Nun è nnecessaria 'a traduzione,
nun tene bbisogno 'e spiegazione.
S'ausa spisso...è cchiena 'e vita.
sape 'e bbuono: è ddoce...sapurita.

È na parola tarmente facile,
ca nun s'ha dda manco studià.
P' 'a dicere nun hê essere strologo
e nun hê essere bravo a pparlà.

Però te dà nu calore, nu cunfuorto,
n' emozione ca nun se ponno spiegà.
È na parola, ma pare n'abbraccio:
è cchiena d'ammore e umanità.


È na parola ca se dice c' 'o core,
chiena 'e sentimento, chiena d'ammore.
P' 'a dicere nun ce vo' 'sta granne abilità:
è facile, ognuno sape dicere "mammà."
Giovanna Balsamo

Tiene na faccella pezzerella pezzerella,
ca mme trase tutta quanta 'int'a na mana.
Mme guarde, ride cu 'st'uocchie vicchiarielle,
ca nun ponno guardà cchiù tanto luntano.

'Int'ê capille puorte nu farzuletto culurato:
'o stesso ca purtave ncapa 'a ggiuventù.
Mme guarde e rride cu na vocca senza diente:
te so' ccadute e nun cresciarranno cchiù.

'Int'a ll'uocchie tiene tutta ll'innocenza
'e chi nun sape che vo' dicere a ffa' male.
Tiene 'a stessa limpidezza e ttrasparenza
'e chi se riflette 'int'a nu specchiale.

Mme guarde cu 'sta faccella 'e nenna,
ca 'o tiempo fujenno t'ha strupicciato.
Ll'anne so' ppassate e ttu te si' fatta tantella:
comm'a na criaturella...mo si' addeventata.

Te piglio pe mmano, tu mme viene appriesso
e rride cuntenta: si' ffelice 'e mme vedé.
Mme vien'arreto comm'a qquann'io criaturella,
e ppezzerenella currevo appriesso a tte.

Mme guarde 'o naso, 'a vocca, 'o viso...
tutta cuntenta mme dice ca t'arrassumiglio.
Po' veco 'int'ê cciglie ca na lacrema te sponta:
vedenneme pruove ancora tanta meraviglia.

M'abbracce e astrignenneme forte triemme,
'int'a ll'uocchie tiene appicciata na sciamma.
Over'è, fra tanti core tuoste, core 'e preta:
'o cchiù bello è sempe 'o core 'e mamma.

M'aggio fatto dduje cunte, a uocchio e ccroce,
forse...fosse meglio si muresse a Nuvembre.
Nun me va bbuono Luglio...è ttroppo cauro:
o fosse meglio si mme ne jesse a Settembre?

No, Settembre nun è ccosa, manco se po' ffa':
'o tiempo è ancora buono, 'a gente a mare va.
'O mese Austo? E chi mme vene appriesso:
nun ce sta rifrisco a ll'ombra d' 'e cipresse!

A Ggennaio fa friddo, ognuno se rincresce:
chiove, maletiempo fa...nun tanto se jesce.
Sotto ê ffeste 'e Natale? Manco a nne parlà:
stanno tutte quante ndaffarate a ffesteggià.

'O mese 'e Marzo? E no...llà manco è ccosa:
miette ca ô tiempo lle piglia 'a pazzaria...
se nfonna tutta quanta 'a casciulella mia?
'O mese 'e Aprile...no, no, manco va bbuono:

ogneduno piglia suonno a cchella staggione.
Nun se putesse fa' ca fra ll'aneme trapassate,
se putesse vuttà 'sta morta mia int'a scurdata?
Fosse meglio si muresse 'e juorne d''e muorte;

si tutto fila liscio e si quaccosa nun va stuorto!
Accussì jesse bbona i' e tutte quante ll'ate:
mmiez'a ttanta muorte i' stesse ggià priata!
Fra chi se chiagne 'o marito, chi 'a muglieria,

na lacrema pe mme ce jesce: almeno spero!
Quanno sarrà nun attaccate c' 'a solita litannia,
dicenno ch'ero brava: sparagnateve ll'ipocrisia!
Na parulella però, accussì 'e pressa 'e pressa,

si overo tenite voglia, dicitammella 'o stesso!
Senza esaggerà e mmentre priate a Mmaria,
fra na preghiera e n'ata, dedicateme na poesia.
Pe mmo...sto' ancora bbona...e ggrazie tante:

cu ll'aiuto 'e Ddio e d' 'e sante vaco annante.
Ma fosse bbello si quann'essa allong'a mana,
lle putesse di': nun tenco genio mo, passa dimane.

‘N’addumanna m’’e bbalenata ‘ncapa,
tenenne mente ‘na processione:
quanti apriesso ‘a ll’assequie ce vanno
pecchè se sentono ‘e ce ‘sta,
sentenne dispiacere pe’ chi
‘sta dinto ‘a cascia ‘e lignammo
facennese ll’uddimo viaggio,
primm’’e fernì sotto sette palmi,
‘e nu stanno facennese sul ‘na passiata?
Miezo ‘e primme filere, quasi sempe,
so’ lacrime ‘e afflizione genuine, pe’ carità!
Nun me permetto ‘e dicere ‘o cuntraio.
Ma quanto chiù areto vaje
te v’’a zumpà ’a ll’uocchio
ca chi ‘sta là ce ‘sta pe’ cumparì.
Ll’anema ‘e chillu poverello
‘o chella poverella, ‘e turno, nu sulo
‘sta ‘a s’arraggià, vedenne
chelle ca fuine ‘e carne soie
chiuse strinto e ‘o scuro, tiseche,tiseche,
m’adda sentì chilli quatto scriteriati
ca chiacchiereano d’’e cose lloro
e stanno là sul pe’ cumparenza.
I’ ‘o restarraggio ditto, primmo
‘e caccià ll’ultimo ciato,
ca ‘ncoppo ‘e manifesti
c’adda starrà scritto, grusso,
‘e parole ca seguono:
nu v’appresentate
sì ata fa torcere into ‘a panza
ll’anemella mia, pecchè, v’’o ggiuro,
ca venarrà ‘a notte abbecino ‘o lietto
e dispietto dopo dispietto
‘na mala nuttata vi farà passà.

         ‘O iuorno
Dint’’o  spécchio ‘e mare,
ca ‘fonn’’e scogli, addò,
‘ncoppo, sorge ‘a chiesa
d’’o ossercurso a Ischia,
vurria, chillu iuorno
ca se sarrà cunzumata
’a cannela d’’a vvita,
ca ‘e cennere meie
fosseno iettate. Senza
chiante e sciallaquà sciure. Sulo
‘na cosa addumanno, ‘a chi
chi m’’a vuluto bbene: ca vene là,
ogni tanto, pe’
‘na piscata e ‘na prearia.

      ‘O vvino malandrino
Trequarti ’e cancella penzieri,
nu russo ca pare velluto,
‘ntramente se ‘ntrattene
int’’o cannarone.

Trequarti ’e cancella penzieri,
ca doce me fanno tracullà,
fino ’a quanno
nu me addubecheo.

Trequarti ’e malandrino,
‘n aglianico ’mbruglione,
ca ‘nzieme ‘e penzieri
‘o male capa me lassa.