Che vvo' chesta lunella birichina,
c'accumpare 'int'ô scuro quann'è nnotte:
è nu lampione ca ncielo s'appiccia
e t'abbaglia comm'a cciento cannelotte.

'A llà ncoppa splennenno s'affaccia:
si 'a fisse pare ca te guarda nfaccia.
Te fa ll'occhiolino, nu vasillo te dà
e ogni ccore nnammurato fa suspirà.

S'avvanta 'sta lunella spucchiosa...
orgogliosa s'appiccia e s'allumma.
Cu nu gruosso penniello pitta 'o mare
e cculora cu ll'argiento 'o lago, 'o sciumme.

Quanno ê vvote se mette 'e travierzo,
va scutulianno 'e vvele d' 'e vvarche.
Ogni mmarenaro fa fatica a ttira 'e rrezze,
pe ttramento c' 'o carico 'e pesce se mbarca.

Che ddice 'sta lunella appassiunata,
quanno 'int'ô scuro te porta n'ammasciata.
Te fa venì a mmente 'e suspire, 'e pparole
'e quacche ppassione ca tiene 'int'ô core.

Che vvo' 'sta luna ntristita e spirciusella,
ca se ncupisce quann'o tiempo è bbrutto.
Se mette nfaccia nu gruosso farzuletto,
ca manu mano 'e llacreme ll'asciutta.

Che vvo' 'sta luna a fforma 'e cunnulella
ca quanno dorme se fa vucà da 'e stelle.
Che vvo' sta luna tonna tonna e cchiena,
sciasciona e bbella quanno se fa grossa.

Nun appena nu raggio 'e sole ll'allumma
s'appiccia, se nfervora e sse fa tutta rossa.
Ncopp'â strata triste, scura e ssulagne,
'a luna fa 'a sentinella: osserva e vveglia.

Ntanto n'omme triste, scunsulato e mbriaco
ca pe ccumpagnia tene sulo na bbutteglia,
se guard' 'o mare cu ll'acqua lucente e bbruna
e ncantato se mmirà 'o cielo cu ddoje lune.
"
1 1 1 1 1
clicca sulle stelle per valorizzare il testo
Profilo Autore: Giovanna Balsamo  

Questo autore ha pubblicato 221 articoli. Per maggiori informazioni cliccare sul nome.

Commenti  

Franco Marchitiello
# Franco Marchitiello 04-04-2023 23:32
Sei veramente brava! Una padronanza della lingua notevole (pur mancando da Napoli dal 1965, il napoletano è la mia lingua madre); la poesia è tenera ed evocativa e i versi sono ben strutturati. Ti faccio i miei più vivi complimenti.
Lilith50
# Lilith50 05-04-2023 14:43
Che brava! Scrivere in dialetto napoletano è difficilissimo, mantenere i contenuti non rinunciando alla musicalità è quasi arduo. Applausi!!

Collegati o registrati per lasciare un commento.

Questo sito utilizza cookie, anche di terze parti, per migliorare la tua esperienza e offrire servizi in linea con le tue preferenze. Chiudendo questo banner, scorrendo questa pagina o cliccando qualunque suo elemento acconsenti all'uso dei cookie.
Per maggiori informazioni sui cookie e per gestire le preferenze sui cookie (di prima e/o terza parte) si invitano gli utenti a visitare anche la piattaforma www.youronlinechoices.com. Si ricorda però che la disabilitazione dei cookie di navigazione o quelli funzionali può causare il malfunzionamento del Sito e/o limitare il servizio.