Club Poetico

Ah, sto' cchiena...
‘e dulure stammatina:
quase quase mme piglio n’aspirina.
Tenco pure nu poco ‘e male ‘e panza…
forze tenco… quacche intolleranza.

Eccì! Eccìù! E… ccià!
Aggio fatto ciento starnute:
si vaco annanze accussì,
so' ggià pronta p' 'o tauto!

Uh Madonna mia,
comme sto’ ccumbinata…
Ccà, pe’ mme muovere,
nce vo’ nu carrarmato!

Aggio fatto nu colpo ‘e tosse,
mpietto tenco nu dulore…
Neh! Che sta succedendo?
Niente niente fosse ‘o core?

Salute a vvuje… e parlanno cu ddecenza,
nun vaco bbona ‘e cuorpo…
però tenco nu poco ‘e flatulenza!
‘O core fa “pu ppù”…
Ah, nun ce ‘a faccio cchiù!

Quanno saglio ‘e scale,
mme vene ll’affanno:
tenesse ll’enfisema
o quacch’atu malanno?

Quanno respiro, faccio ‘o siscariello…
ma niente niente tenesse…
nu poco ‘e brunchitella?

‘A verità è cca ê vvote…
mme mpressiono.
‘A vecchiaia mme fa…
nu poco suggezzione.

‘O duttore dice:
ca nun m'aggi’ ‘a preoccupà…
nun tenco niente ‘e grave:
so' affetta… da anzianità!

Passata ‘a sissantina…
è nu dulore ogni mmatina!
Allora nun fa niente…
accussì vaco annanze:
nu poco zuppechianno…
cu quacche mmale ‘e panza.

Nun me mporta si spisso
mme fanno male ‘e rine…
si tenco ‘o core pazzariello
e nu poco ballerino.

Nun fa niente si ê vvote
tremmo c’ ‘a mano…
si pure cu ‘e llente
nun veco a vicino e a luntano.

E nnun voglio penzà
a qquanno vaco
a ffernì ‘int'ô puzzo…

D’ ‘o calice d’ ‘a vita
mme voglio bbere
nfin’a ll’urdemo surzo!

Quann’essa vene,
annanz’â porta fa: “drin drin!”
I’ aizanno ‘o calice
faccio ll’urdemo bbrinnese:
Cin cin! ????