Club Poetico

Chi nasce cu 'a cammisa,
oppure ggià miezo acciso.
Chi nasce acciurtato,
bello e mprufummato.

Chi nasce niro comm'a pece,
chi russo, chi paunazzo.
Chi nasce dint'ô castello,
chi dint'a nu bbello palazzo.

Chi nasce figlio 'e zoccola,
chi figlio 'e pascià o 'e rrè.
Chi nasce senza ggenio
e senza manco 'o vvulé.

Chi nasce figlio 'e nisciuno,
o sotto ô chiaro 'e luna.
Chi nasce figlio 'e ntrocchia,
o dinto a na parrocchia.

Chi nasce pe sbaglio
e cchi miezo cacaglio.
Chi nasce senza peccato,
comm'ô giglio mmaculato.

Chi nasce affurtunato
e nun prova maje mbarazzo
e cchi vene vummecato
comme fusse sputazza.

Comm'è, comme nun è...
sarrà come sarrà...ma...
na fella 'e bbona ciorta,
ogneduno ll'avess'â pruvà.

E ppo' sarranno mazze 'e rose,
mazze 'e scopa, mazze 'e carte.
Sarranno cape sciacquere,
carte 'e tressette, mbrattacarte.

Na sola cosa è ccerta;
o si' bbravo o faje 'o pazzo ..
dint'â vita pe ccampà bbuono,
...nce vo' 'o mazzo.