Accussì s'avutaje 'o pettene astritto 'a pettenessa:
"Te può pure attiggià, a me 'nun me faje fesso." 

"Nuje simme comme 'a cazza e 'a cucchiara.
picciò 'nun te tuculià comme 'a 'na janara."

"J' songo capace 'e sciogliere 'e nurechille..."
"songo 'o spasso d'ê ffemmene e d'ê capille!"

Rispunnette 'a pettenessa tutta 'nquartata,
sbattennese comme a 'na papera scannata.

"Tu sciuoglie 'o nureco ma 'nun lieve 'o perucchio!
"Faje sulo chiacchiere e maje niente accucchie."

Accussì s'attiggiava e se frusciava 'o petteniello,
mentre levava ll'ove 'nsieme 'e perucchielle.

"Sentitelo, va dicenne ca fa chello ca faccio j'..."
"Mme faccio 'e ccroce: Giuseppe, Gesù e Maria."

"J' cu cchesta pettenessa tutta culurata,
me 'nfizzo dinto 'e capille e una e pure 'e n'ata."

"Tutte 'e ffemmene cu mme addeventene pupate:
famme sentere, tu quanta cape hê pettinato?"

"Mentre tu faje felice bammulelle e ccapere,
j' lasso 'e ccape pulite e senza 'nu penziero."

"'O perucchio, si 'o vuò sapè, cu mme schiatta:
'nun 'o faccio maje addeventà ciuotto e cchiatto."

"Nvece j' quanno mme 'nfizzo dint'ê capille,
faccio accumparè tutte 'e boccole, 'e ricciulille."

"Pecchè j' songo bella, culurata: so' 'a pettenessa.
Aggrazio 'e ccape: cu mme so' tutte principesse."

"Tutte 'e nureche primma o poje venene a mme:
chiano chiano j' 'e sbruvoglie e senza farle patè."

"Pecchè j' songo aperta, abbundante e spaziosa,
tengo 'e diente larghe. So' stuzzicante e sfiziosa."

"E tu? Tu tiene 'e diente chiuse, 'nserrate e fitte fitte."
"Vattenne, si 'nzipeto: si sulo 'nu pettene astritto."


1 1 1 1 1
clicca sulle stelle per valorizzare il testo
Profilo Autore: Giovanna Balsamo  

Questo autore ha pubblicato 147 articoli. Per maggiori informazioni cliccare sul nome.

Collegati o registrati per lasciare un commento.

Questo sito utilizza cookie, anche di terze parti, per migliorare la tua esperienza e offrire servizi in linea con le tue preferenze. Chiudendo questo banner, scorrendo questa pagina o cliccando qualunque suo elemento acconsenti all'uso dei cookie.
Per maggiori informazioni sui cookie e per gestire le preferenze sui cookie (di prima e/o terza parte) si invitano gli utenti a visitare anche la piattaforma www.youronlinechoices.com. Si ricorda però che la disabilitazione dei cookie di navigazione o quelli funzionali può causare il malfunzionamento del Sito e/o limitare il servizio.