Club Poetico

Saglimmo, scennimmo c'affannammo.
Redimmo, chiagnimmo, po' pazziammo.
Nce sta chi corre e vva sempe 'e pressa,
chi rallenta, chi sta allerto pe scummessa.

Chi aspetta chillu treno ca nun passa maje,
chi va mparaviso: senza penà, senza guaje.
Nu viavaje 'e crestiane p' 'a strada c'aspetta
e ggente ca tutt' 'e mmatine se tira 'a carretta.

Chi attacca 'o ciuccio addó va 'o patrone,
chi votta cauce...aiza 'a voce e sse mpone.
Nce stann'uommene putente, tanta pezziente
e nu cuofano 'e ggente ca nun vale niente.

Chello ca conta è cca se tira a ccampà,
nfino a quanno 'a salute è bbona e nce sta.
Quanno a ll'intrasatto fernesce 'a cummedia,
chella ca pe qquaccuno è stata na tragedia,

salutammo 'o pubblico, c'avviamo llà ncoppa,
senza nce affannà, senza correre troppo.
Fra ciento, mille suspire e ccu na bbona lena,
nce levammo 'a cuollo ll'abetiello 'e scena.

Mentre ce ne jammo guardamm'o paesaggio,
stammo mpaurite, ma ce facimmo curaggio.
Sisca, sisca 'o siscariello 'o capostazione:
so' ppronte 'e carrozze...saglieno 'e pperzone.

Curre, fa ampresso... piglia 'a rincorza...
nun te può pperdere chest'urdema corza.
E ppe ttramento ca 'o treno fa "ciuf ciuf",
votta fummo e ncopp'ê bbinarie sbuffa...

arreto a na nuvola janca, chiena 'e vapore,
alluccano 'e rrote e ss'avvia 'o mutore.
Nce affannammo p'essere quaccheduno,
p'addeventà cenere: nun simmo nisciuno.

Guardammo attuorno, mmiez'ô sferragliamiento,
e ppenzammo: "tantu rummore pe nniente!"